रत्नागिरी : महर्षी कर्वे स्त्री शिक्षण संस्था संचलित महर्षी कर्वे महिला महाविद्यालयात येथे “स्वत: पासून समाजापर्यंत : करिअर आणि कौशल्य विकासात महिलांची भूमिका” या विषयावर एक प्रेरणादायी मार्गदर्शनपर कार्यक्रम मोठ्या उत्साहात झाला. महिलांच्या सर्वांगीण विकासाच्या दृष्टीने या कार्यक्रमाचे आयोजन करण्यात आले होते व यानिमित्ताने माजी राज्यसभा सदस्य डॉ. विनय सहस्त्रबुद्धे, यांनी संस्थेला सदिच्छा भेट दिली व व्याख्यान झाले.
प्रारंभी मान्यवरांच्या हस्ते प्रतिमापूजन करण्यात आले. आश्रमगीताने कार्यक्रमाला मंगल वातावरणाची जोड दिली. प्रकल्प समन्वयक स्वप्नील सावंत यांनी आपल्या प्रास्ताविकातून कार्यक्रमामागील संकल्पना स्पष्ट करत महिलांनी शिक्षणाबरोबरच कौशल्य विकासावर भर देणे काळाची गरज असल्याचे नमूद केले.
यानंतर प्रमुख मान्यवरांची ओळख करून देऊन त्यांचा सत्कार करण्यात आला. संस्थेच्या रत्नागिरी येथील वाटचालीचा एकूण आढावा सीए आनंद पंडित यांनी सादर केला. त्यांनी संस्थेने शिक्षण, सामाजिक बांधिलकी आणि महिला सक्षमीकरणासाठी केलेल्या कार्याचा उल्लेख केला.
कार्यक्रमाचे प्रमुख वक्ते माजी राज्यसभा सदस्य डॉ. विनय सहस्रबुद्धे यांनी आपल्या अभ्यासपूर्ण भाषणात महिलांच्या करिअर घडणीत कौशल्य विकास, आत्मविश्वास, नेतृत्वगुण आणि समाजाभिमुख दृष्टिकोन यांचे महत्त्व विशद केले. महिलांनी स्वतःच्या प्रगतीबरोबरच समाजाच्या उन्नतीसाठीही सक्रिय भूमिका घ्यावी, असे त्यांनी आवाहन केले. त्यांच्या मार्गदर्शनपर विचारांना उपस्थित विद्यार्थीनींकडून भरभरून प्रतिसाद मिळाला. कार्यक्रमाच्या शेवटी आभार प्रदर्शन करण्यात आले. पसायदानाने कार्यक्रमाची सांगता झाली.
या कार्यक्रमास स्काय रोबोटिक प्रा. लि. चे संस्थापक व संचालक अभिजीत सहस्त्रबुद्धे, महर्षी कर्वे स्त्री शिक्षण संस्थेचे प्रकल्प प्रमुख मंदार सावंत देसाई, स्थानीय व्यवस्थापन समिती सदस्य प्रसन्न दामले, कृष्णमूर्ती बुक्का, संस्थापक स्काय रोबोटिक प्रा. लि., बीसीए प्र. प्राचार्य स्नेहा कोतवडेकर, नर्सिंग प्र. प्राचार्य समीना मुलानी, सौ संपदा जोशी, प्राध्यापकवृंद, कर्मचारी तसेच मोठ्या संख्येने विद्यार्थीनी उपस्थित होत्या. या कार्यक्रमामुळे विद्यार्थीनींमध्ये करिअरविषयक सकारात्मक दृष्टीकोन निर्माण झाला.
