रत्नागिरी नाचणे येथे युवासेनेच्या वतीने शालेय विद्यार्थ्यांना मोफत छत्री वाटप

रत्नागिरी : शिवसेना (उद्धव बाळासाहेब ठाकरे) पक्षाच्या ६० व्या वर्धापन दिनाचे आणि वंदनीय बाळासाहेब ठाकरे यांच्या जन्मशताब्दी वर्षाचे औचित्य साधून रत्नागिरीत एका सामाजिक कार्यक्रमाचे आयोजन करण्यात आले होते. युवासेनेच्या वतीने जिल्हा परिषद आदर्श शाळा, नाचणे क्र. ३ मधील विद्यार्थ्यांना मोफत छत्र्यांचे वाटप करण्यात आले. हा कार्यक्रम अत्यंत उत्साही आणि सकारात्मक वातावरणात पार पडला.

या सामाजिक उपक्रमाला शिवसेना उद्धव बाळासाहेब ठाकरे पक्षाचे रत्नागिरी शहर प्रमुख प्रशांत साळुंखे, युवासेना जिल्हाप्रमुख प्रसाद सावंत, युवासेना तालुका युवती अधिकारी युक्ता आंबेकर, उपतालुका अधिकारी पूजा वाडेकर आणि योगेश आंबेकर प्रामुख्याने उपस्थित होते. मान्यवरांच्या हस्ते लहान मुलांना छत्र्यांचे वाटप करण्यात आले, ज्यामुळे विद्यार्थ्यांच्या चेहऱ्यावर मोठा आनंद पाहायला मिळाला.

कार्यक्रमादरम्यान बोलताना शिवसेना शहरप्रमुख श्री. साळुंखे यांनी जिल्हा परिषद शाळांच्या सद्यस्थितीवर भाष्य केले. नाचणे येथील मराठी शाळेची घटलेली विद्यार्थी संख्या पाहून त्यांनी तीव्र चिंता व्यक्त केली. मराठी शाळा टिकवणे आणि त्या मजबूत करणे ही काळाची गरज असल्याचे त्यांनी यावेळी नमूद केले.

छत्री वाटपानंतर पदाधिकाऱ्यांनी शाळेच्या परिसराची पाहणी केली. यावेळी शाळेच्या स्वच्छतागृहाची अत्यंत मोडकळीस आलेली आणि दुरवस्था झालेली स्थिती पाहून श्री. साळुंखे कमालीचे आक्रमक झाले. लहान मुलांच्या आरोग्याशी होणारी ही हेळसांड खपवून घेतली जाणार नाही, असे सांगत त्यांनी या गंभीर समस्येबाबत वरील संबंधित वरिष्ठ अधिकाऱ्यांपर्यंत दाद मागण्याचा आणि ही व्यथा मांडून प्रश्न मार्गी लावण्याचा ठाम शब्द दिला.

या यशस्वी उपक्रमाचे आयोजन युवासेना उपतालुका अधिकारी सौ. पूजा ओंकार वाडेकर यांच्या वतीने करण्यात आले होते. कार्यक्रमाला शाळेतील शिक्षक, विद्यार्थी आणि स्थानिक नागरिक मोठ्या संख्येने उपस्थित होते.