नगर भूमापन मिळकतींमध्ये फेरफार नोंदीसाठी इप्सित प्रणालीमध्ये नवीन ४ फेरफार प्रकारांची सुविधा सुरू

रत्नागिरी : नगर भूमापन मिळकतींमध्ये फेरफार नोंद घेण्यासाठी इप्सित प्रणालीमध्ये नवीन ४ फेरफार प्रकारांची सुविधा सुरू झाली आहे. नागरिकांनी https://epsit.mahabhumi.gov.in या संकेतस्थळाचा वापर करून जास्तीत जास्त प्रमाणात या सुविधेचा लाभ घ्यावा, असे आवाहन नगर भूमापन अधिकारी सोनल काळे यांनी केले आहे.

इप्सित प्रणालीद्वारे यापूर्वी पुरविलेल्या फेरफार प्रकारामध्ये वारसनोंद, खरेदीनोंद, हक्क सोडपत्र नोंद, बक्षीसपत्र नोंद, गहाणखत नोंद इत्यादी सेवा पुरविण्यात आलेल्या असून आता

या प्रणालीद्वारे नवीन नोंदणीकृत मृत्युपत्र / इच्छापत्र, अनोंदणीकृत मृत्युपत्र/इच्छापत्र, भाडेपट्टा नोंद, एकत्र कुटुंब मॅनेजर (ए. कु. मॅ. नोंद कमी करणे) या चार नोंदीचा नव्याने समावेश करण्यात आला आहे. सद्यस्थितीत एकूण ९ फेरफार प्रकार इप्सित प्रणालीद्वारे नागरिकांसाठी ऑनलाईन फेरफार अर्ज करण्याकामी उपलब्ध झाले आहेत.

इप्सित म्हणजेस इलेक्टॉनिक प्रॉपर्टी सिस्टीम इंटिग्रेटेड टूल या प्रणालीद्वारे मिळकत पत्रिकांमध्ये फेरफार अर्ज ऑनलाईन करण्याची सुविधा असून, या नोंदीसाठी अर्जदार घरी बसून अर्ज करू शकत असल्याने या प्रणालीस नागरिकांचा उत्स्फूर्त प्रतिसाद मिळाला आहे. शासकीय कामकाजात पारदर्शकता व गतिमानता याचे उत्तम उदाहरण ही प्रणाली ठरली आहे.