खेडशी येथे भीषण अपघातात दुचाकीस्वाराचा जागीच मृत्यू; दोघे गंभीर

रत्नागिरी : शहरापासून जवळच असलेल्या खेडशी महालक्ष्मी मंदिराजवळ, राधाकृष्ण ग्रेनाईडसमोर शनिवारी रात्री साडेनऊच्या सुमारास एक भीषण अपघात झाला. भरधाव वेगात असलेल्या ॲक्सेस दुचाकीने रस्त्यावरून जाणाऱ्या रिक्षा-टेम्पोला जोरदार धडक दिल्याने ही दुर्घटना घडली. या अपघातात दुचाकीस्वार युवकाचा जागीच मृत्यू झाला असून, त्याच्यासोबत असलेले अन्य दोघे तरुण गंभीर जखमी झाले आहेत.

निवळीकडून रत्नागिरीच्या दिशेने जाणारी रिक्षा-टेम्पो (एमएच ०८ बीसी १२७९) रात्री सुमारे ९.२० वाजता खेडशी महालक्ष्मी मंदिराजवळून जात असताना, समोरून येणाऱ्या ॲक्सेस दुचाकीने (एमएच ०८ एडब्ल्यू १६६२) तिला धडक दिली. धडक इतकी जोरदार होती की परिसरात एकच खळबळ उडाली. विशेष म्हणजे, अपघातग्रस्त ॲक्सेस दुचाकीवर तीन तरुण प्रवास करत होते.

या अपघातात दुचाकी चालवणारा राज सुधाकर कोत्रे (वय १९) याचा जागीच दुर्दैवी मृत्यू झाला. तर, दुचाकीवर असलेले त्याचे सहकारी आर्यन विनोद कुरतडकर (१९) आणि पार्थ विजय कुरतडकर (१९, तिघेही रा. कापडगाव, ता. रत्नागिरी) हे दोघे तरुण गंभीर जखमी झाले आहेत. जखमींवर तातडीने उपचार सुरू करण्यात आले आहेत.

या मार्गावर वारंवार अपघात घडत असतानाही, तीन आसनी प्रवास, वेगावर नियंत्रण नसणे आणि रात्रीच्या वेळी वाहनचालकांकडून होणारा निष्काळजीपणा व नियमांचे उल्लंघन यामुळे जीवघेणे प्रकार घडत असल्याचे या घटनेतून पुन्हा एकदा स्पष्ट झाले आहे. या घटनेमुळे परिसरात हळहळ व्यक्त होत असून, अपघाताबाबत पुढील तपास पोलीस करत आहेत.