आबलोली (संदेश कदम) : विश्वरत्न डॉ. बाबासाहेब आंबेडकर यांच्या पत्नी, त्यागमूर्ती माता रमाई आंबेडकर यांची १२८ वी जयंती नुकतीच बौद्धजन पंचायत समिती शाखा क्र. ४३४ (मुंबई), भिमाई महिला मंडळ आणि धम्मदीप तरुण मंडळ यांच्या विद्यमाने आंध्र प्रजा संघ हॉल, न्यू हनुमान नगर रहिवासी संघ, गोरेगाव (प.) येथे साजरी करण्यात आली.
कार्यक्रमाच्या सुरुवातीला धम्मवंदना व त्रिशरण गाथा घेण्यात आली. त्यानंतर उपस्थित मान्यवरांच्या हस्ते माता रमाई आंबेडकर, डॉ. बाबासाहेब आंबेडकर आणि तथागत गौतम बुद्ध यांच्या प्रतिमांना पुष्प अर्पण करून दीपप्रज्वलन करण्यात आले.
यावेळी विचारमंचावर भिमाई महिला मंडळाच्या अध्यक्षा संगीता धोत्रे, ‘वृत्त दिनांक’च्या पत्रकार मेघना सुर्वे आदी मान्यवर उपस्थित होते. कार्यक्रमाचे अध्यक्षपद दिनेश लोखंडे यांनी भूषविले. प्रमुख वक्ते ॲड. विशाल वळंजू यांनी माता रमाई यांचा जीवनप्रवास आपल्या भाषणातून प्रभावीपणे मांडला. तसेच महिला मंडळातील महिलांनीही माता रमाई यांच्याविषयी आपले विचार व्यक्त केले.
या कार्यक्रमास शाखेतील अनिल हळदे, रविंद्र गमरे, चंद्रमणी मोहिते, चंद्रकांत गायकवाड, मंगेश जाधव तसेच महिला मंडळातील भक्ती जाधव, मानिषा लोखंडे, रोशनी गमरे, सुप्रिया कदम, पद्ममिनी सूर्यवंशी, वंदना गायकवाड, पौर्णिमा सदाम्हस्के आदींसह शाखेतील सभासद, पदाधिकारी, सल्लागार आणि स्थानिक रहिवासी मोठ्या संख्येने उपस्थित होते.
कार्यक्रम यशस्वी करण्यासाठी शाखेचे कार्यकर्ते व भिमाई महिला मंडळाच्या कार्यकारिणीने विशेष मेहनत घेतली. यावेळी उपस्थित शाखेतील सदस्य व पदाधिकाऱ्यांचा सत्कार करण्यात आला. शेवटी सर्वांना अल्पोपहार देऊन कार्यक्रमाची सांगता करण्यात आली.
