रत्नागिरीच्या आरोग्यसेवेत नवी भर

रत्नागिरी : लायन्स क्लब ऑफ रत्नागिरी चॅरिटेबल ट्रस्टच्या माध्यमातून लायन्स नेत्र रुग्णालय,रत्नागिरी येथे ‘सौ. उमा वामन बेडेकर लायन्स ब्लड स्टोरेज सेंटर’ सुरू करण्यात येत असून, या केंद्राचा शुभारंभ ६ सप्टेंबर रोजी मान्यवरांच्या उपस्थितीत करण्यात येणार आहे.

गरजू रुग्णांना आवश्यकतेच्या वेळी सुरक्षित रक्त उपलब्ध व्हावे, या उद्देशाने सुरू करण्यात येणारे हे केंद्र रत्नागिरीच्या आरोग्यसेवेसाठी एक महत्त्वाचे पाऊल ठरणार आहे. अपघातग्रस्त रुग्ण, शस्त्रक्रिया, प्रसूती तसेच विविध वैद्यकीय परिस्थितींमध्ये रक्ताची आवश्यकता भासते. अशा वेळी वेळेवर रक्त उपलब्ध होणे अत्यंत महत्त्वाचे असते. या पार्श्वभूमीवर या कोल्हापूर येथील वैभवलक्ष्मी रक्तपेढीच्या सहकार्याने ब्लड स्टोरेज सेंटर ची स्थापना करण्यात येत आहे.

या केंद्राला सौ. उमा वामन बेडेकर यांचे नाव देण्यात येत आहे. माणुसकी, सेवाभाव आणि गरजूंच्या मदतीची भावना ही त्यांच्या जीवनमूल्यांची वैशिष्ट्ये होती. त्यांच्या स्मृतीला केवळ स्मारकाच्या माध्यमातून नव्हे, तर समाजाच्या प्रत्यक्ष उपयोगी पडणाऱ्या सेवाकार्याच्या माध्यमातून चिरस्थायी करण्याचा हा प्रयत्न आहे.

याबाबत बोलताना लायन डॉ. संतोष बेडेकर MJF यांनी सांगितले की, “आईच्या नावाने एखादी वास्तू उभी करणे ही केवळ स्मृती ठरेल; मात्र तिच्या नावाने सुरू झालेले सेवाकार्य एखाद्या गरजू व्यक्तीच्या जीवनाला आधार देत असेल, तर तीच तिच्यासाठी खरी आदरांजली ठरेल. या केंद्राच्या माध्यमातून रक्ताची गरज असलेल्या रुग्णांना वेळेवर मदत मिळावी आणि रत्नागिरीमध्ये स्वैच्छिक रक्तदानाची चळवळ अधिक व्यापक व्हावी, ही आमची मनापासूनची इच्छा आहे.”

लायन्स क्लब ऑफ रत्नागिरी चॅरिटेबल ट्रस्टच्या सामाजिक बांधिलकीचा हा आणखी एक महत्त्वपूर्ण टप्पा असून, या उपक्रमासाठी वैद्यकीय क्षेत्रातील तज्ज्ञ, रुग्णालये, सामाजिक संस्था, युवक संघटना आणि नागरिकांचे सहकार्य अपेक्षित आहे.

या केंद्राच्या माध्यमातून स्वैच्छिक रक्तदानाला प्रोत्साहन देणे, नियमित रक्तदात्यांचा समूह निर्माण करणे आणि गरजू रुग्णांसाठी वेळेवर रक्ताची उपलब्धता सुनिश्चित करण्यासाठी प्रयत्न करणे, हा संस्थेचा प्रमुख उद्देश आहे.

उद्घाटनाच्या निमित्ताने भव्य रक्तदान शिबिर आयोजित करण्यात येणार आहे. सर्व रक्त दात्यांचा मेडल देऊन विशेष सन्मान करण्यात येईल.

“रक्तदान हे केवळ दान नाही, तर जीवनदानाची संधी आहे,” या भावनेतून नागरिकांनी या सामाजिक उपक्रमात सहभागी व्हावे, असे आवाहन लायन्स क्लब ऑफ रत्नागिरी चॅरिटेबल ट्रस्टच्या वतीने करण्यात आले आहे.

डॉ. संतोष बेडेकर यांच्या आईच्या स्मृतीतून सुरू होणारे हे केंद्र रत्नागिरीच्या माणुसकीच्या सेवेला नवी दिशा देईल आणि भविष्यात अनेक गरजू रुग्णांसाठी ‘आशेचा आधार’ ठरेल, असा विश्वास व्यक्त करण्यात आला आहे.

— लायन्स क्लब ऑफ रत्नागिरी चॅरिटेबल ट्रस्ट, रत्नागिरी