रत्नागिरी जिल्हा मध्यवर्ती सहकारी बँकेला “बेस्ट बँक ऑफ द इअर व इनोव्हेटिव्ह बँक ऑफ इअर पुरस्कार” प्राप्त
रत्नागिरी : रत्नागिरी जिल्हा मध्यवर्ती सहकारी बँक ही तळागाळातील जनतेसाठी व शेतकऱ्यांच्या आर्थिक उन्नत्तीसाठी कृतीशिल जाणीवेतून सहकार क्षेत्रामध्ये वाटचाल करित आहे. रत्नागिरी जिल्ह्यामध्ये बँकेच्या माध्यमातून एक सहकार पर्व सुरू झाले असून, जिल्ह्यातील शहर व ग्रामीण पातळीवरील बँकेचे ग्राहक, हितचिंतक, ठेवीदार व कर्जदार यांचे आर्थिक उन्नत्तीसाठी बँक विविध योजना राबवीत आहे. कृषी क्षेत्राला प्राधान्य देण्यासाठी सहकार क्षेत्रातील मान्यताप्राप्त प्रशिक्षण संस्थांमार्फत प्राथमिक शेती संस्थांचे पदाधिकारी व सचिव यांना कर्जवाटप व वसुलीसंदर्भात प्रबोधन करण्यासाठी बँकिंग विषयक कार्यशाळा व शेतकरी मेळाव्यांचे बँक दरवर्षी आयोजन करीत असते. बँकेने सहकारी संस्थांच्या सबलीकरणाला नेहमीच प्राधान्य दिले आहे.
दि.३१ मार्च २०२५ अखेर बँकेच्या ठेवी २८६६.८७ कोटी, कर्जे २१९९.६४ कोटी असून बँकेने ५००० कोटी व्यवसायाचा टप्पा पार केला आहे. तसेच बँकेला सलग १५ वर्षे ऑडिट वर्ग ‘अ’ मिळाला असून, सलग १३ वर्षे नक्त एनपीएचे प्रमाण ० टक्के आहे.
बँकेच्या ठेवींमधील वृध्दी, कर्जवसुली तसेच नफ्यामध्ये उल्लेखनीय वाढ झाली असून, यासाठी बँकेचे सभासद, हितचिंतक याचबरोबर बँकेच्या कर्मचाऱ्यांनी बँकेचे अध्यक्ष कृषीभूषण डॉ. तानाजीराव चोरगे व संचालक मंडळ यांच्या मार्गदर्शनाखाली उल्लेखनीय कामगिरी केली आहे. बँकेला आजपर्यंत महाराष्ट्र शासनाचे सहकार भूषण व सहकारनिष्ठ असे दोन पुरस्कार प्राप्त झाले असून बँकेला आतापर्यंत एकूण १९ पुरस्कार प्राप्त झाले आहेत.
बँकेची जिल्ह्यात १९ एटीएम सेंटर कार्यान्वित असून, सध्या विविध क्षेत्रांत आधुनिक तंत्रज्ञानाचा अवलंब होत असून, डिजिटल बँकींग क्षेत्र देखील अधिकाधिक विस्तारित होत आहे. यामध्ये रत्नागिरी जिल्हा मध्यवर्ती बँकेने देखील बँकेच्या ग्राहकांना विविध डिजिटल सेवा पुरविल्या आहेत. रत्नागिरी जिल्हा बँकेचे सहकार क्षेत्रातील नेतृत्वगुण, नावीन्य, बँकिंग अद्यावत धोरणे, नवीन तंत्रज्ञान तसेच बँकिंग क्षेत्रातील सकारात्मक बदल. बँकेच्या या कामगिरीमुळे बँकिंग क्षेत्रातील बँकेच्या योगदानाचा विचार करुन मे. इ प्लस इंटेलेक्च्युअल मीडिया, नवी मुंबई यांनी रत्नागिरी जिल्हा बँकेला सन २०२५ चा बेस्ट बँक ऑफ द इअर व इनोव्हेटिव्ह बँक ऑफ इअर हा पुरस्कार देवून गौरविले आहे.
हा पुरस्कार वितरण सोहळा ३१ जानेवारी रोजी नोवोटेल हॉटेल, खोपोली येथे निवृत्त विशेष पोलिस महानिरीक्षक डॉ. संजय शिंदे यांच्या हस्ते पुरस्कार प्रदान करण्यात आला. या सोहळ्याला प्रमुख अतिथी म्हणून इंडियन बँकिंग असोसिएशनचे डेप्युटी सीईओ गोपाळ भगत, महाराष्ट्र राज्य बँकेचे माजी कार्यकारी संचालक प्रमोद कर्नाड, महाराष्ट्र को-ऑपरेटिव्ह बँक फेडरेशनचे अध्यक्ष अजय ब्रम्हेचा या प्रमुख मान्यवरांची उपस्थिती होती.
या कार्यक्रमात सेंट्रल बोर्ड ऑफ बँक रिझर्व्ह बँकेचे संचालक सतीश मराठे, डेप्युटी डायरेक्टर जनरल मिनिस्टर ऑफ कम्युनिकेशन, (भारत सरकार) सुन्मेश जोशी या प्रमुख मान्यवरांची उपस्थिती होती. या पुरस्कार सोहळ्याला बँकेचे संचालक मधुकर शंकर टिळेकर, रामचंद्र गणपत गराटे, मुख्य कार्यकारी अधिकारी डॉ. सुधीर प्रभाकर गिम्हवणेकर, सरव्यवस्थापक समीर रमेश दळवी, उपसरव्यवस्थापक संतोष कृष्णा खेडसकर हे उपस्थित होते.
पुरस्कार वितरण सोहळ्याच्या निमित्ताने सद्यस्थितीत बँकिंग क्षेत्रात होणारे अमुलाग्र बदल व बदलत्या अत्याधुनिक तंत्राच्या वापरामुळे बँकांपुढे नवीन आव्हाने याबाबत चर्चासत्र आयोजित केले होते. यातून बँकांनी पुढे कशी वाटचाल करावी यावर पुरस्कार सोहळ्या दरम्यान उपस्थित मान्यवरांनी मार्गदर्शन केले.
बँकेला “बेस्ट बँक ऑफ द इअर व इनोव्हेटिव्ह बँक ऑफ इअर” पुरस्कार प्राप्त झाल्यामुळे, बँकेच्या भविष्यकालीन वाटचालीस मान्यवरांकडून मनःपुर्वक शुभेच्छा देण्यात आल्या असून, बँकेला मिळालेल्या पुरस्काराबाबत विविध स्तरावरुन अभिनंदनाचा वर्षाव होत आहे.
