शृंगारतळी येथे ‘शृंगारतळीचा राजा’ म्हणून ओळखल्या जाणाऱ्या मानाच्या गणपतीचे ढोल-ताशांच्या गजरात आगमन
आबलोली (संदेश कदम) : गुहागर तालुक्यातील शृंगारतळी येथे तब्बल २८ वर्षांची मोठी परंपरा असलेल्या आणि शृंगारतळीचा राजा म्हणून संपूर्ण परिसरात अत्यंत लोकप्रिय असलेल्या मानाच्या गणपतीचे आज ढोल-ताशांच्या गजरात आणि उत्साही वातावरणात आगमन झाले.
या शृंगारतळीच्या राजाच्या आगमन मिरवणुकीचे सर्वात मोठे आणि विशेष वैशिष्ट्य म्हणजे यात केवळ हिंदू धर्मीयच नव्हे तर शृंगारतळी परिसरातील मुस्लिम बांधव सुद्धा तितक्याच भक्तिभावाने सहभागी झाले होते. चिखली ते शृंगारतळी अशी ही भव्य मिरवणूक काढण्यात आली होती. या मिरवणुकीत दोन्ही धर्माच्या बांधवांनी एकत्र येत बाप्पाचे स्वागत केले, ज्यामुळे संपूर्ण परिसरात जातीय सलोख्याची एक सुंदर प्रचिती आली.
या मिरवणुकीत अबालवृद्धांपासून ते महिला आणि लहान मुलांपर्यंत सर्वच जण मोठ्या संख्येने सहभागी झाले होते. ढोल-ताशांच्या तालावर संपूर्ण परिसर मंत्रमुग्ध झाला होता. विशेष म्हणजे, गुहागर पोलीस प्रशासनाने देखील कायदा व सुव्यवस्था राखत या मिरवणुकीदरम्यान मोलाचे सहकार्य केले, ज्यामुळे हा सोहळा अत्यंत शांततेत आणि शिस्तीत पार पडला.
