चिपळूण : नजीक असलेल्या खेर्डी एमआयडीसी परिसरातील एका फर्निचर निर्मिती कारखान्याला काल (२३ सप्टेंबर) रात्री दहा वाजण्याच्या सुमारास अचानक भीषण आग लागली. पाहता पाहता या आगीने रौद्ररूप धारण केल्याने संपूर्ण कारखाना काही क्षणांत आगीच्या भक्षस्थानी पडला. या दुर्घटनेत कारखान्यातील साहित्याचे लाखोंचे नुकसान झाल्याचा प्राथमिक अंदाज वर्तवला जात आहे.
घटनेची माहिती मिळताच चिपळूण नगरपालिकेचा अग्निशमन बंब तातडीने घटनास्थळी दाखल झाला. जवानांनी आग आटोक्यात आणण्यासाठी सर्वतोपरी शर्थीचे प्रयत्न केले. दरम्यान, खेर्डी एमआयडीसीमध्ये फायर स्टेशनची इमारत उभारण्यात आली असली, तरी वारंवार मागणी करूनही अद्याप तेथे स्वतंत्र अग्निशमन बंब उपलब्ध झालेला नाही, ही गंभीर बाब या निमित्ताने पुन्हा एकदा समोर आली असून उपस्थितांनी या अक्षम्य दुर्लक्षाकडे तीव्र शब्दांत लक्ष वेधले आहे.
घटनेचे गांभीर्य ओळखून ठाकरे सेनेचे विधानसभा क्षेत्रप्रमुख बाळासाहेब कदम तसेच पालिकेचे बांधकाम सभापती कपिल शिर्के यांनी सहकाऱ्यांसह घटनास्थळी उपस्थित राहत मदतकार्याला गती दिली. दुसरीकडे, राष्ट्रवादी काँग्रेसचे नेते नितीन ठसाळे यांनीही मुंबईत असताना तातडीने सूत्रे हलवून आवश्यक ती मदत पोहोचवण्यासाठी प्रयत्न केले. आगीचे वृत्त परिसरात वाऱ्यासारखे पसरताच रात्री उशिरा घटनास्थळी स्थानिक नागरिकांनी मोठी गर्दी केली होती.
