जागतिक व्यासपीठावर सैतवडेचा डंका! 

रत्नागिरी : ग्रामीण भागातील गुणवत्तापूर्ण शिक्षणाचा गौरव आता आंतरराष्ट्रीय स्तरावर होऊ लागला आहे. रत्नागिरी जिल्ह्यातील रत्नागिरी तालुक्यातील सैतवडे येथील दी मॉडेल इंग्लिश स्कूल आणि मुस्लिम एज्युकेशन सोसायटी या दोन्ही अग्रगण्य संस्थांनी शैक्षणिक क्षेत्रात एक ऐतिहासिक टप्पा गाठला आहे. मलेशियाची राजधानी क्वालालंपूर येथे पार पडलेल्या भव्य ‘वर्ल्ड स्कूल समिट २०२६’ (World School Summit 2026) या जागतिक शैक्षणिक शिखर परिषदेत सहभागी होण्यासाठी या संस्थांना अधिकृत नामांकन प्रमाणपत्र (Nomination Certificate) प्रदान करण्यात आले आहे. या आंतरराष्ट्रीय बहुमानामुळे संपूर्ण सैतवडे परिसरासह रत्नागिरी जिल्ह्याच्या शिरपेचात मानाचा तुरा रोवला गेला आहे.

क्वालालंपूर येथे २६ सप्टेंबर रोजी जागतिक स्तरावरील ही उच्चस्तरीय शैक्षणिक परिषद मोठ्या उत्साहात पार पडली. जगाभरातील विविध देशांमधील उत्कृष्ट शाळा, शिक्षणतज्ज्ञ आणि शैक्षणिक संस्थांचे प्रतिनिधी या परिषदेत एकत्र आले होते. या आंतरराष्ट्रीय व्यासपीठावर कोकणातील ग्रामीण भागात कार्यरत असलेल्या सैतवडेच्या संस्थांची निवड होणे ही अत्यंत दुर्मिळ आणि अभिमानास्पद बाब मानली जात आहे. ग्रामीण पार्श्वभूमी असूनही दर्जेदार शिक्षण आणि उत्तम व्यवस्थापनाच्या जोरावर जागतिक स्तरावर ठसा उमटवता येतो, हे या यशामधून सिद्ध झाले आहे.

‘दी मॉडेल इंग्लिश स्कूल’ आणि ‘मुस्लिम एज्युकेशन सोसायटी’ यांनी गेल्या अनेक वर्षांपासून सैतवडे आणि आसपासच्या परिसरातील विद्यार्थ्यांना आधुनिक व मूल्याधिष्ठित शिक्षण देण्याचे निरंतर कार्य केले आहे. या नामांकनामुळे दोन्ही संस्थांच्या शैक्षणिक कामगिरीवर, शिस्तबद्ध व्यवस्थापनावर आणि विद्यार्थ्यांच्या सर्वांगीण विकासासाठी सुरू असलेल्या प्रयत्नांवर जागतिक मोहर उमटली आहे. या आंतरराष्ट्रीय मान्यतेमुळे संस्थांच्या शिरपेचात केवळ मानाचा तुराच रोवला गेला नाही, तर भविष्यात शिक्षणाचा दर्जा अधिक उंचावण्यासाठी आणि विद्यार्थ्यांना नवनवीन संधी उपलब्ध करून देण्यासाठी एक नवी ऊर्जा मिळाली आहे.

या ऐतिहासिक आणि उल्लेखनीय यशाबद्दल दोन्ही संस्थांचे व्यवस्थापन मंडळ, सर्व सदस्य, मुख्याध्यापक, शिक्षकवृंद, शिक्षकेतर कर्मचारी, गुणवंत विद्यार्थी, सजग पालक आणि संस्थांच्या सर्व हितचिंतकांवर कौतुकाचा आणि अभिनंदनाचा वर्षाव होत आहे. ग्रामीण भागातील शैक्षणिक वाटचालीस नवी दिशा देणारा हा गौरव सैतवडेच्या शैक्षणिक प्रगतीचा सुवर्ण अध्याय ठरला असून, दोन्ही संस्थांची यशस्वी वाटचाल अशीच नवनवीन शिखरे पादाक्रांत करत राहो, अशा शुभेच्छा सर्व स्तरातून दिल्या जात आहेत.