महाराष्ट्र एनसीसी कॅडेट्सचा ‘प्री-मेन्यू’ प्रशिक्षण कॅम्प यशस्वीरीत्या संपन्न

रत्नागिरी : नॅशनल कॅडेट कॉर्म्सच्या (एनसीसी) वतीने आयोजित १० दिवसांच्या ‘प्री-मेन्यू’ प्रशिक्षण कॅम्पचा आज रत्नागिरीत यशस्वी समारोप झाला. आगामी ‘मेन्यू २७’ओपन सी सेलिंग मोहिमेची पूर्वतयारी म्हणून आयोजित केलेल्या या कॅम्पमध्ये महाराष्ट्रभरातून आलेल्या १२० कॅडेट्सना सागरी नौकावहन, रोईंग आणि दर्यावर्दी कौशल्यांचे विशेष प्रशिक्षण देण्यात आले.

या शिबिरात पुणे, नागपूर, छत्रपती संभाजीनगर आणि मुंबई ग्रुप मुख्यालयातील कॅडेट्सचा समावेश होता. यात १०४ नेव्ही, १४ आर्मी आणि ०२ एअरफोर्स कॅडेट्सनी एकत्र येत त्रि-सेवा एकतेचे उत्कृष्ट उदाहरण मांडले. गेल्या १० दिवसांत कॅडेट्सनी २७-फूट ‘डीके व्हेलर’ बोटी चालवण्याचे प्रत्यक्ष प्रात्यक्षिक घेतले. तसेच, कॅडेट्समधील साहसी वृत्ती आणि आत्मविश्वास वाढवण्यासाठी रॅपलिंग (Rappelling) आणि समुद्रातील पॅरासेलिंग (Parasailing) यांसारख्या साहसी उपक्रमांचे प्रशिक्षणही देण्यात आले.

प्रशिक्षित १२० कॅडेट्सपैकी ६० सर्वोत्तम कॅडेट्सची मुख्य ‘मेन्यू २७’ सागरी मोहिमेसाठी निवड करण्यात आली आहे. ही मोहीम रत्नागिरी ते पालशेत आणि परत असा तब्बल २५० किलोमीटरचा सागरी प्रवास पूर्ण करेल. यंदाच्या मोहिमेची संकल्पना ‘कोकण ज्ञान तरंग’ अशी असून, “ज्ञान आणि प्रगतीची धरून कास- आदर्श कोकणाचा करूया विकास” हे याचे ब्रीदवाक्य आहे.

“आमचे कॅडेट्स फक्त समुद्राच्या लाटांवर मात करणार नाहीत, तर सामाजिक बदलाचे दूत म्हणून काम करतील,” असे प्रसारमाध्यमांशी बोलताना कमांडिंग ऑफिसर यांनी सांगितले. “२५० किमीच्या या प्रवासात आमचे कॅडेट्स विविध किनारपट्टीच्या भागात ‘पथनाट्य’ सादर करून सर्वांसाठी सक्तीचे शिक्षण आणि महिला शिक्षण व सक्षमीकरण यांसारख्या महत्त्वाच्या विषयांवर जनजागृती करतील.”

या मोहिमेची पूर्वतयारी म्हणून सर्व १२० कॅडेट्ससाठी रत्नागिरीतील मत्स्यालयआणि खाडीतील खारफुटी क्षेत्राची शैक्षणिक भेट आयोजित करण्यात आली होती. कॅडेट्सना सागरी जैवविविधता आणि पर्यावरण संवर्धनाचे धडे दिल्याबद्दल एनसीसी महाराष्ट्राच्या वतीने फिशरीज पॉलिटेक्निक इंजिनिअरिंग कॉलेज, शिरगाव आणि आसामंत फाउंडेशनचे विशेष आभार मानण्यात आले.

उत्कृष्ट प्रशिक्षण आणि उच्च मनोबलाच्या जोरावर एनसीसी कॅडेट्स आता ‘मेन्यू २७’ मोहिमेसाठी पूर्णपणे सज्ज झाले असून, कोकण किनारपट्टीवर सामाजिक जागरूकतेचा नवा संदेश देण्यास उत्सुक आहेत.