६ महिन्यांच्या बाळाचे सर्पदंशातून प्राण वाचले

चिपळूण : महाड तालुक्यातील गोटे बुद्रुक येथील अवघ्या ६ महिन्यांच्या बाळाचे सर्पदंशानंतर बी.के.एल. वालावलकर रुग्णालयातील वैद्यकीय अधिकारी व परिचारिका यांच्या तत्पर उपचारांमुळे प्राण वाचले असून बाळाला पूर्णपणे स्थिर अवस्थेत घरी सोडण्यात आले आहे.

सम्रान सागर गोलांबडे (वय ६ महिने), रा. गोटे बुद्रुक, ता. महाड, जि. रायगड हे बाळ ता. २३ रोजी पहाटे सुमारे ३.३० वाजता घरी झोपलेले असताना अचानक जोरात रडू लागले. बाळाच्या आई-वडिलांनी जागे होऊन पाहिले असता बाळाजवळ फुरसे (Saw-scaled Viper) जातीचा विषारी साप आढळून आला. तपासणी केली असता बाळाच्या डाव्या काखेच्या भागात दंशाची खूण, रक्तस्त्राव व सूज दिसून आली.

बाळाला तातडीने उपजिल्हा रुग्णालय, महाड येथे दाखल करण्यात आले. तेथे तपासणीदरम्यान सर्पविषामुळे गंभीर रक्तविषारी (Hemotoxic) परिणाम झाल्याचे निदर्शनास आले. बाळाची प्रकृती गंभीर असल्याने पुढील उपचारांसाठी बी.के.एल. वालावलकर रुग्णालय, डेरवण येथे पाठविण्यात करण्यात आले.

रुग्णालयात दाखल होताच बाळाची प्रकृती गंभीर असल्याने त्याला अतिदक्षता विभागात (PICU) हलविण्यात आले. डॉक्टरांनी तात्काळ सर्पविष प्रतिबंधक उपचार सुरू केले. वेळेवर दिलेल्या प्रतिविष (Anti Snake Venom) उपचारांमुळे विषाचा प्रभाव नियंत्रणात आला. डॉक्टरांच्या कुशल उपचारांमुळे व परिचारिकांच्या सातत्यपूर्ण काळजीमुळे बाळाची प्रकृती हळूहळू सुधारली व अखेर बाळाला पूर्णपणे स्थिर अवस्थेत घरी सोडण्यात आले.

या यशस्वी उपचारामध्ये डॉ. अनिल कुर्णे, डॉ. अंकिता सुर्वे, डॉ. मोहित कडू, डॉ. विशाखा संकपाळ, डॉ. पंक्ति मेहता, डॉ. स्वप्नील काळे, डॉ. प्रतीक गोडसे, डॉ. विवेक सूर्यवंशी, डॉ. प्रिया वाघमारे, डॉ. विवेक पवार, डॉ. प्रणय गावंडे आणि डॉ. अजय पाटील यांचे विशेष योगदान दिले.