रत्नागिरी : नुकत्याच झालेल्या रत्नागिरी जिल्हास्तरीय खुल्या तायक्वांदो स्पर्धेत ईगल तायक्वांदो सेंटरच्या खेळाडूंनी पदार्पणातच चांगली भरारी घेतली.
अभ्युदय नगर इथल्या नगरपालिका बहुउद्देशीय सभागृह येथील ईगल तायक्वांदो सेंटरमध्ये प्रशिक्षण घेणारे खेळाडू या स्पर्धेत सहभागी झाले होते. यातील क्योरोगी म्हणजेच (फाईट) या प्रकारात पीवी गटात १४ किलो वजनाखाली आर्या रोशन ढवण हिने सुवर्णपदक मिळवले. सब जुनिअर मुलींच्या ३२ किलो खालील गटात आराध्या सागर लोखंडे हिने रौप्यपदक मिळवले. तर नायशा मयूर कांबळे हिने पुमसे या प्रकारात पेअरमध्ये रौप्य आणि ग्रुपमध्ये कास्यपदक मिळवले.
ईगल तायक्वांदो सेंटरच्या प्रशिक्षिका संकेता संदेश सावंत आणि सह प्रशिक्षिका सई संदेश सावंत यांच्याकडे हे खेळाडू घडत असून त्यांना युवा तायक्वांदोचे प्रमुख प्रशिक्षक राम करा आणि शशी रेखा करा यांचेही अधिक मार्गदर्शन मिळाले. त्यांच्या या यशाबद्दल सर्वत्र त्यांचे अभिनंदन करण्यात येत आहे.
