जात प्रमाणपत्र अवैध ठरल्याने राजापूरच्या नगरसेविका अफरोज झारी यांचे सदस्यत्व रद्द

राजापूर : नगरपालिकेच्या डिसेंबर २०२५ मधील सार्वत्रिक निवडणुकीत प्रभाग क्रमांक ६ (अ) मधून काँग्रेसच्या तिकिटावर निवडून आलेल्या नगरसेविका अफरोज महमंद झारी यांचे सदस्यत्व रद्द करण्यात आले आहे. त्यांचे इतर मागास वर्ग (नाभिक) जातीचे प्रमाणपत्र जिल्हा जात प्रमाणपत्र पडताळणी समितीने अवैध ठरविल्यानंतर रत्नागिरी जिल्हाधिकारी कार्यालयाने सदस्यत्व रद्द करण्याचे आदेश जारी केले. त्याबाबतचे पत्र काल (२९ जुलै) राजापूर नगरपालिकेला प्राप्त झाले. त्यामुळे पालिकेतील एक जागा रिक्त झाली आहे.

यापूर्वी जिल्हा जात प्रमाणपत्र पडताळणी समितीने अफरोज झारी यांचे जात प्रमाणपत्र अवैध ठरविले होते. विशेष म्हणजे, त्यांच्याविरोधात निवडणूक लढविणाऱ्या राष्ट्रवादी काँग्रेस (अजित पवार गट)च्या निलोफर मुकादम यांचेही जात प्रमाणपत्र समितीने अवैध घोषित केले होते. जात पडताळणी समितीच्या निर्णयानंतर जिल्हाधिकारी कार्यालयाने नगरसेविका अफरोज झारी यांचे सदस्यत्व रद्द करण्याचे आदेश राजापूर नगरपालिकेला पाठविले. हे पत्र बुधवारी पालिका प्रशासनाला प्राप्त झाल्याची माहिती प्रशासनाने दिली.

राजापूर नगरपालिकेत सध्या महाविकास आघाडीची सत्ता आहे. लोकनियुक्त नगराध्यक्षांसह महाविकास आघाडीकडे १० नगरसेवक आणि एक स्वीकृत सदस्य असे संख्याबळ आहे. तर विरोधी महायुतीकडे १० नगरसेवक आणि एक स्वतंत्र स्वीकृत सदस्य असे एकूण ११ सदस्य आहेत. अफरोज झारी यांचे सदस्यत्व रद्द झाल्याने महाविकास आघाडीचे संख्याबळ घटले असून नगरपालिकेतील राजकीय समीकरणांमध्ये बदल होण्याची शक्यता निर्माण झाली आहे.

या पार्श्वभूमीवर आगामी काळात काही महत्त्वाच्या विषयांवरील निर्णय घेताना नगराध्यक्षांना कास्टिंग व्होटचा वापर करावा लागू शकतो, अशी चर्चा राजकीय वर्तुळात सुरू आहे. तसेच रिक्त झालेल्या जागेसाठी पुढील कायदेशीर प्रक्रिया आणि पोटनिवडणुकीकडेही आता लक्ष लागले आहे.