गणेशोत्सवाच्या पार्श्वभूमीवर आमदार किरण सामंत यांची अधिकाऱ्यांसोबत आढावा बैठक

लांजा : आगामी गणेशोत्सवाच्या पार्श्वभूमीवर कोकणात मोठ्या संख्येने दाखल होणाऱ्या चाकरमान्यांना आणि गणेशभक्तांना प्रवासादरम्यान तसेच गणेशोत्सव काळात कोणत्याही प्रकारची अडचण निर्माण होऊ नये, यासाठी आमदार किरण सामंत यांनी लांजा तालुक्यातील विविध विभागांच्या प्रमुख अधिकाऱ्यांसोबत आढावा बैठक घेतली. गणेशोत्सवासाठी कोकणात येणाऱ्या नागरिकांच्या सुविधांना सर्वोच्च प्राधान्य देत सर्व विभागांनी परस्पर समन्वयाने काम करावे, अशा स्पष्ट सूचना त्यांनी अधिकाऱ्यांना दिल्या.

गणेशोत्सव हा कोकणातील महत्त्वाचा सण असून, या काळात मुंबई, पुणे तसेच राज्याच्या विविध भागांतून मोठ्या संख्येने चाकरमानी आपल्या गावी येतात. त्यामुळे रस्त्यांवरील वाढती वाहतूक, संभाव्य वाहतूक कोंडी, रस्त्यांची स्थिती, वीज व पाणीपुरवठा, आरोग्य सेवा, स्वच्छता तसेच आपत्कालीन परिस्थिती याबाबत प्रशासनाने आगाऊ नियोजन करणे आवश्यक आहे. या पार्श्वभूमीवर आमदार सामंत यांनी संबंधित विभागांकडून विविध विषयांचा सविस्तर आढावा घेतला.

गणेशोत्सव काळात वाहनांची संख्या मोठ्या प्रमाणात वाढण्याची शक्यता असल्याने प्रमुख मार्गांवर वाहतूक सुरळीत राहण्यासाठी आवश्यक नियोजन करण्याच्या सूचना देण्यात आल्या. गर्दीच्या ठिकाणी अतिरिक्त पोलिस बंदोबस्त, वाहतूक नियंत्रणासाठी आवश्यक उपाययोजना तसेच आपत्कालीन परिस्थितीत तातडीने मदत उपलब्ध होईल, याची दक्षता घेण्याचे निर्देश आमदार सामंत यांनी दिले.

रस्त्यांवरील खड्डे, धोकादायक वळणे, अरुंद मार्ग तसेच वाहतूक कोंडी होण्याची शक्यता असलेल्या ठिकाणांची पाहणी करून आवश्यक उपाययोजना तातडीने पूर्ण करण्याच्या सूचनाही देण्यात आल्या.

दरड व झाडे कोसळण्याच्या घटनांबाबत सतर्क राहण्याचे निर्देश

गणेशोत्सव काळात पावसाची शक्यता लक्षात घेता रस्त्यावर दरडी किंवा झाडे कोसळून वाहतूक ठप्प होऊ नये, यासाठी संबंधित यंत्रणांनी आवश्यक यंत्रसामग्री, मनुष्यबळ आणि आपत्कालीन पथके सज्ज ठेवावीत, असे निर्देश देण्यात आले.

गणेशोत्सव काळात घरगुती तसेच सार्वजनिक गणेश मंडळांच्या माध्यमातून विविध धार्मिक व सांस्कृतिक कार्यक्रम आयोजित केले जातात. त्यामुळे वीजपुरवठा सुरळीत राहणे आवश्यक आहे. संभाव्य बिघाड झाल्यास तातडीने दुरुस्ती पथक उपलब्ध करून द्यावे. तसेच वीजवाहिन्या, ट्रान्सफॉर्मर आणि इतर यंत्रणेची आवश्यक तपासणी करून घ्यावी, अशा सूचना महावितरणच्या अधिकाऱ्यांना देण्यात आल्या.

गणेशोत्सव काळात गावागावांतील नागरिकांना नियमित व पुरेसा पाणीपुरवठा मिळावा, यासाठी विशेष नियोजन करण्याचे निर्देश देण्यात आले.

मोठ्या संख्येने नागरिकांची ये-जा लक्षात घेता आरोग्य विभागानेही सतर्क राहावे, प्राथमिक आरोग्य केंद्रे व रुग्णालयांमध्ये आवश्यक औषधसाठा उपलब्ध ठेवावा आणि आपत्कालीन परिस्थितीत नागरिकांना तातडीने उपचार मिळतील, याची दक्षता घ्यावी, अशा सूचना देण्यात आल्या.

“गणेशभक्तांना कोणत्याही प्रकारची अडचण निर्माण होणार नाही, याची दक्षता घ्या. नागरिकांच्या तक्रारींवर तातडीने कार्यवाही करा आणि गणेशोत्सव आनंदी, सुरक्षित व सुरळीत वातावरणात पार पडण्यासाठी सर्व विभागांनी समन्वयाने काम करा,” असे आमदार किरण सामंत यांनी स्पष्ट केले.

गणेशोत्सवासाठी कोकणात येणाऱ्या चाकरमान्यांना सुरक्षित, सुखकर आणि अडथळेमुक्त प्रवासाचा अनुभव मिळावा, यासाठी प्रशासनाने विशेष काळजी घ्यावी, अशी अपेक्षाही त्यांनी व्यक्त केली.

या बैठकीला लांजा तालुक्यातील सर्व संबंधित विभागांचे प्रमुख अधिकारी उपस्थित होते. बैठकीमुळे गणेशोत्सवाच्या पार्श्वभूमीवर प्रशासनातील विविध यंत्रणा अधिक सतर्क झाल्या असून, आवश्यक उपाययोजनांना गती मिळण्याची अपेक्षा व्यक्त करण्यात येत आहे.