पालीचे ग्रामदैवत श्री लक्ष्मीपल्लीनाथचा उ‌द्यापासून शिमगोत्सव

रत्नागिरी : तालुक्यातील पालीचे ग्रामदैवत श्री लक्ष्मीपल्लीनाथ देवस्थान,पाली – पाथरटचा वार्षिक शिमगोत्सव उद्यापासून (२७ फेब्रुवारी) सुरू होत आहे. यानिमित्त विविध धार्मिक कार्यक्रमांचे आयोजन मोठ्या उत्साहामध्ये केले जाते. यामध्ये पालखी सजविणे, देवाला रूपे लावणे, होळी आणणे, पौर्णिमेचा होम, नवस बोलणे-फेडणे यांसारखे धार्मिक कार्यक्रम होतात. तसेच नमनाचा सांस्कृतिक कार्यक्रमही होतो.

पालीच्या श्री लक्ष्मीपल्लीनाथ देवस्थानची शिमगोत्सव नियोजनाची सभा नुकतीच फाक पंचमीला मंदिरामध्ये देवस्थानचे अध्यक्ष व मुख्य मानकरी संतोष सावंतदेसाई यांच्या अध्यक्षतेखाली पार पडली. या सभेला देवस्थानचे मानकरी गुरुराज सावंत, अनंत पालकर, प्रदीप घडशी, बबन काजरेकर, सुभाष गराटे, चंद्रकांत गुडेकर, विष्णू माईण, रोहित पांचाळ, अनिल धाडवे, गुरुप्रसाद धाडवे व पाली-पाथरटमधील ग्रामस्थ उपस्थित होते.

शिमगोत्सवाची सुरुवात २७ फेब्रुवारी रोजी होणार आहे. या दिवशी दुपारी २ ते सायंकाळी ६ यावेळेत देवाची पालखी सजविणे, सुशोभित करणे, देवाला रूपे लावणे, ६ ते ७ यावेळेत पूजा, घाट धुपारती आरती, सायंकाळी ७ ते रात्री ११.३० यावेळेत देवाच्या पालखीचे दर्शन आणि रात्री ११.३० नंतर श्रींची पालखी खेळविण्यासाठी मंदिराबाहेर प्रांगणात आणणे व खेळविणे, असे कार्यक्रम होतील.

२८ फेब्रुवारी रोजी दुपारी २ वाजता सहाणेवरून श्री देव व गावकरी नियोजित ठिकाणी होळी आणण्यासाठी जातील, होळी आणून उभी करून पूजा करणे, त्यानंतर रात्री ९.३० वाजता होळीजवळ नवस बोलणे व फेडणे. रात्री १०.३० वा. पाली गावच्या सुप्रसिद्ध नमनाचा कार्यक्रम होणार आहे.

२ मार्च रोजी दुपारी २ वाजता सहाणेवरून श्रीदेव व गावकरी पाथरट, कापडगाव, चरवेली यापैकी नेमलेल्या ठिकाणाहून श्रींची कोकड होळी आणण्यासाठी जातील, सायंकाळी ६ वाजता कोकड होळी घेवून येतील, रात्री ९ ते १० यावेळेत श्रींची कोकड होळी गुलालाची उधळण करीत नाचवत खेळवत मोडणे, रात्री १० वाजता पौर्णिमेचा होम होईल व होळीच्या शेंड्याजवळ नवस बोलणे व फेडणे कार्यक्रम, रात्री १०.३० वाजता पाथरट गावच्या सुप्रसिद्ध नमनाचा कार्यक्रम होईल.

३ मार्च रोजी धुळवडीसाठी ढोल व निशाण जाईल. ८ मार्च रोजी रंगपंचमी दिवशी सहाणेवर बैठकीत शिपण्याचा कार्यक्रम होईल व देवाच्या ग्रामफेरीचे नियोजन होईल, त्यानंतर श्री लक्ष्मीपल्लीनाथांचे ज्या ठिकाणी प्रथम आगमन झाले त्या देवाचा आंबा (देवतळे) येथे जाईल व देवाची पालखी गावाची पूजा स्वीकारील. त्यानंतर गादीवर मुख्य मानकरी व खोत संतोष सावंतदेसाई यांच्या येथे देवाची पालखी जाईल व गादीवरची पूजा स्वीकारेल. त्यानंतर मानाप्रमाणे मानकरी व गावकरी यांच्या घरोघरी जाउन पालखी पूजा स्वीकारेल. त्यानंतर १९ मार्च रोजी गुढीपाडव्यादिवशी सायंकाळी पालखीची ग्रामफेरी पूर्ण होऊन गादीवर मुख्य मानकरी व देवस्थानचे अध्यक्ष संतोष सावंतदेसाई (खोत) यांच्या घरी पालखी वस्तीला राहील त्यावेळी गादीवरची पूजा, सवाशेराचा महानेवैद्य, महाप्रसाद असा कार्यक्रम होईल. रात्री देवासाठी श्रमपरिहार म्हणून पालीच्या गावकरी यांचे नमन होईल. त्यानंतर दुसऱ्या दिवशी म्हणजे २० मार्च रोजी गादीवरची गावाची बैठक होऊन तेथून ढोलताशांच्या गजरात श्रीदेव लक्ष्मीपल्लीनाथांची पालखी मंदिराच्या प्रांगणात प्रवेश करेल. त्यानंतर गावाचे गाऱ्हाणं होऊन ढोलताशांच्या गजरात श्री लक्ष्मीपल्लीनाथ व पालखीत स्थानापन्न सर्व देवता यांची घाट धुपारतीने पूजा होऊन मंदिरात स्थानापन्न होतील.

सर्व भाविकांनी पालखीत स्थानापन्न श्रीदेव लक्ष्मीपल्लीनाथ, श्री देवी महालक्ष्मी, श्री देवी नवलाई, श्री देवी महाकाली, श्री देवी पावणाई, श्री देवी जुगाई, श्री देव करंबेळदेव श्री देवी त्रिमुखी माता या देवतांच्या दर्शनाचा लाभ घेण्याचे आवाहन मुख्य मानकरी व श्री लक्ष्मी पल्लीनाथ देवस्थानचे अध्यक्ष संतोष सावंतदेसाई (खोत) यांनीकेले आहे.