रत्नागिरी : महिलांच्या वैयक्तिक तक्रारी व समस्यांचे निवारण करण्यासाठी जिल्हास्तरावर दर महिन्याच्या तिसऱ्या सोमवारी ‘जिल्हास्तरीय महिला लोकशाही दिन’ आयोजित करण्यात येतो. ऑगस्ट महिन्याचा महिला लोकशाही दिन सोमवारी (१७ ऑगस्ट) रोजी सकाळी ११ ते दुपारी १ या वेळेत जिल्हाधिकारी कार्यालयाच्या सभागृहात आयोजित करण्यात आला आहे.
या लोकशाही दिनाचे मुख्य वैशिष्ट्य म्हणजे तक्रारदार महिलांना स्वतः उपस्थित राहून आपल्या तक्रारींच्या अनुषंगाने थेट निवेदन सादर करता येते. महिलांनी मांडलेल्या वैयक्तिक प्रश्नांवर आणि तक्रारींवर तातडीने कार्यवाही करण्यासाठी उपस्थित जिल्हास्तरीय संबंधित अधिकाऱ्यांना या वेळी आवश्यक ते निर्देश दिले जातात.
रत्नागिरी जिल्ह्यातील ज्या महिलांचे वैयक्तिक प्रश्न किंवा तक्रारी प्रलंबित आहेत, त्यांनी या सुवर्णसंधीचा लाभ घेऊन लोकशाही दिनाला उपस्थित राहावे, असे आवाहन प्रशासनातर्फे करण्यात आले आहे.
