आरोग्य, सामाजिक व सहकार क्षेत्रातील तरुण नेतृत्व डॉ. परशुराम निवेंडकर यांचा ५० वा वाढदिवस ५ जुलै रोजी
रत्नागिरी : महाराष्ट्र राज्य जिल्हा परिषद आरोग्य सेवा कर्मचारी संघटनेचे जिल्हाध्यक्ष, राष्ट्रीय रविदास परिषदेचे जिल्हाध्यक्ष, लोक जागृती फाउंडेशनचे संस्थापक तसेच विविध सामाजिक आणि सहकार क्षेत्रात उल्लेखनीय कार्य करणारे डॉ. परशुराम निवेंडकर यांचा ५० वा वाढदिवस आज (५ जुलै) साजरा होत आहे.
डॉ. निवेंडकर हे सध्या प्राथमिक आरोग्य केंद्र, मालगुंड येथे कार्यरत असून त्यांनी रत्नागिरी, संगमेश्वर आणि चिपळूण तालुक्यांमध्ये आरोग्य सेवेत उल्लेखनीय योगदान दिले आहे. ग्रामीण भागातील नागरिकांना दर्जेदार आरोग्य सेवा मिळावी यासाठी त्यांनी सातत्याने कार्य केले असून आरोग्य जनजागृती, विविध राष्ट्रीय आरोग्य मोहिमा आणि कर्मचारी प्रश्नांवर त्यांनी प्रभावी नेतृत्व केले आहे.
सामाजिक क्षेत्रातही त्यांनी महत्त्वपूर्ण कार्य केले आहे. राष्ट्रीय रविदास परिषदेचे जिल्हाध्यक्ष म्हणून सामाजिक समता, शिक्षण आणि जनजागृतीसाठी त्यांनी विविध उपक्रम राबविले. लोक जागृती फाउंडेशनच्या माध्यमातूनही अनेक सामाजिक आणि लोकहिताचे कार्यक्रम आयोजित करण्यात आले आहेत.
सहकार क्षेत्रात त्यांनी जिल्हा परिषद सेवक सहकारी पतसंस्था, रत्नागिरीचे माजी चेअरमन म्हणून यशस्वी नेतृत्व केले असून गृहनिर्माण संस्थेचे सचिव म्हणूनही जबाबदारी पार पाडत आहेत.
कोविड-१९ महामारीच्या कठीण काळात केलेल्या उल्लेखनीय आरोग्य सेवेबद्दल त्यांना तत्कालीन मा. जिल्हाधिकारी व मा. मुख्य कार्यकारी अधिकारी यांच्या हस्ते विशेष पुरस्काराने गौरविण्यात आले. त्यांच्या सामाजिक कार्याची दखल घेत नवी दिल्ली येथील विश्व मानवाधिकार आयोगाने त्यांना मानद डॉक्टरेट प्रदान केली आहे. तसेच आरोग्य क्षेत्रातील उल्लेखनीय योगदानाबद्दल दैनिक नवराष्ट्रच्या वतीने “आदर्श आरोग्य सेवा पुरस्कार” देऊन त्यांचा सन्मान करण्यात आला आहे.
आरोग्य सेवा, सामाजिक बांधिलकी, सहकार आणि कर्मचारी चळवळीतील त्यांच्या उल्लेखनीय योगदानाबद्दल विविध स्तरांतील मान्यवर, सहकारी, मित्रपरिवार आणि हितचिंतकांकडून त्यांच्या ५० व्या वाढदिवसानिमित्त शुभेच्छांचा वर्षाव होत आहे.
