शामराव पेजे महामंडळातर्फे १ लाखांपर्यंतची थेट कर्ज योजना; पात्र नागरिकांना अर्ज करण्याचे आवाहन
रत्नागिरी : शामराव पेजे कोकण इतर मागासवर्गीय वित्त आणि विकास महामंडळांतर्गत ‘१ लक्ष रुपयांपर्यंतची थेट कर्ज योजना’ राबविण्यात येत आहे. या योजनेची सर्वात महत्त्वाची वैशिष्ट्ये म्हणजे यात महामंडळाचा सहभाग १०० टक्के असून, लाभार्थ्याला स्वतःची कोणतीही रक्कम (स्वनिधी) गुंतवण्याची गरज नाही. जिल्ह्यातील पात्र उमेदवारांनी या सुवर्णसंधीचा लाभ घ्यावा, असे आवाहन महामंडळाच्या जिल्हा व्यवस्थापक प्रिती पटेल यांनी केले आहे.
योजनेची वैशिष्ट्ये आणि व्याजाच्या अटी : कमाल मर्यादा – या योजनेअंतर्गत जास्तीत जास्त १ लाख रुपयांपर्यंतचे कर्ज दिले जाईल.
परतफेडीचा कालावधी: कर्जाची परतफेड ४ वर्षांच्या कालावधीत, ४८ समान मासिक हप्त्यांमध्ये करायची आहे.
० टक्के व्याज (नियमित परतफेडीवर): जे लाभार्थी दरमहा रु. २,०८५ चा मुद्दल हप्ता नियमितपणे जमा करतील, त्यांना कोणत्याही प्रकारचे व्याज द्यावे लागणार नाही.
थकीत हप्त्यावर दंड – जर एखादा मासिक हप्ता थकीत राहिला, तर त्या थकीत रक्कमेवर द.सा.द.शे. ४ टक्के दराने व्याज आकारले जाईल.
पात्रता आणि निकष :
या योजनेचा लाभ घेण्यासाठी अर्जदाराने खालील अटी पूर्ण करणे आवश्यक आहे:
वय: अर्जदाराचे वय १८ ते ५५ वर्षे दरम्यान असावे.
उत्पन्न मर्यादा: कुटुंबाचे वार्षिक उत्पन्न ₹१ लाखांपर्यंत असावे.
सिबिल स्कोअर (CIBIL Score): अर्जदाराचा सिबिल क्रेडिट स्कोअर किमान ५०० असणे आवश्यक आहे.
अर्ज कसा करावा?
या योजनेसाठी अर्ज करण्याची प्रक्रिया पूर्णपणे ऑनलाईन आहे. इच्छुक उमेदवारांनी महामंडळाच्या अधिकृत संकेतस्थळावर जाऊन आपले अर्ज सादर करावेत.
वेबसाईट: WWW.MSOBCFDC.ORG
योजनेच्या सविस्तर माहितीसाठी उमेदवारांनी ‘डॉ. बाबासाहेब आंबेडकर सामाजिक न्याय भवन, पहिला मजला, पाटबंधारे स्टॉप, कुंवारबाव, रत्नागिरी’ येथे किंवा ०२३५२ – २२८४७० या फोन नंबरवर संपर्क साधावा.
